ద్వాదశ వర్షములైన తదుపరి పోతులూరయ్య ఆ నదిలో స్నానముచేసి సూర్యార్ఘ్యము విడుచునపుడు ఆ చెట్టుపై నుండి పండొకటి ఆయన దోసిలో పడెను. అపుడు ఆస్వామి తన తపస్సు ఫలించినదని సంతోషించి పాపారాయుని బిలిచి నేను కందిమల్లయపల్లెకు వెళ్లవలెను. నీవిచటనే తపస్సు చేయు చుండుము మోక్షము పొందగలవని చెప్పగా ఓ స్వామీ! మీ ఆజ్ఞ శిరసా వహించెద పూజించుటకు తమ పాదుకలు ఇవ్వగలరని ప్రార్థించగా పోతులూరయ్యస్వామి తన పాదుకలను పాపరాయునకిచ్చి ఆశీర్వదించి తన భార్యను తోడుకొని వెళ్లెను. తదుపరి అచట పాపరాయుడు ఆలయము గట్టించి పాదుకలను ప్రతిష్ఠించి పూజించుచుండెను. నాటి నుండి ఆ నదికి పోతులూరయ్య సెలయేరని వాడుక గలిగెను. ప్రతి శివరాత్రికి అచట పోతులూరయ్య పాదుకలకు ఘనముగా ఉత్సవము జరుపుచున్నారు. నేటికి దర్శించవచ్చును.