జ్ఞానానుభవము గలిగిన సిద్దయ్యకు ఒకనాడు శరీరములో షట్చక్ర ఆధార వివరములు భోధించు చుండెను. అదే గ్రామ మాదిగ కక్కయ్య పరోక్షముగా నుండి గురుశిష్యుల వాదము వినుచు, ఆహా! దేవుళ్లను దర్శించు మార్గము ఎంత సులభముగా నున్నది ఇన్నాళ్ల నుండి తెలిసికొనలేక పోయితిని, ఈ గురువు చెప్పినట్లే చేసి చూచెద కానీ ఎవరిని పరీక్షించవలె, ఎవరినేమి అడిగేది. ఇంటికి వెళ్లి నా భార్యముత్తినే పరీక్షించెదనని బిర బిర ఇంటికి వెళ్లి, ఇల్లాలిని కత్తితో నరికి శరీరమంతా చిందర వందరగా కోసి చూడగా, ఎక్కడ ఏ దేవుడు కనుపించలేదు. ఉగ్రుడై చేతిలో నున్న కత్తిని పారవైచి దుఃఖించుచు పరుగు పరుగున వీరబ్రహ్మేంద్రస్వామి దగ్గరకు వచ్చి ఓ స్వామీ! మీరు పేరు ప్రతిష్ఠలు గల పెద్ద గురువులు మీరు తురుక సిద్దయ్యకు భోదించుచున్న మాటలు విని నిజమని నమ్మి, ఇంటికి వెళ్లి నా ఇల్లాలిని కత్తితో కోసి చూడగ ఎక్కడ ఏ దేవుడు కనుపించలేదు. కాని నా ఇల్లాలిలో యున్న జీవుడు మాత్రము ఎగిరిపోయినాడని చెప్పగా! విని వీరబ్రహ్మేంద్రస్వామి కక్కని శిరస్సును తన సవ్యహస్తముచే నిమురుచు కక్కా! దుఃఖించకు నీ ఇంటికి పోదాము పదా అక్కడనే అన్ని చూయించి నీ సంశయము తీరుస్తానని చెప్పి సిద్దయ్యను తోడుకొని కక్కని ఇంటికి వచ్చి చిందర వందముగా కోసిన ముత్తిని జూచి కక్కనికి ముత్తి శరీరములో మూలాధారము నుండి సహస్రారము వరకున్న దేవతలను వరుసగా చూయించి ముత్తిని బ్రతికించెను.