మీ గ్రామక్షేమము కొరకై ఈ నదిలో మీకు లభించినది. ఇది మీ పూర్వ జన్మపుణ్య ఫలము ఈ విగ్రహాన్ని మీ గ్రామములో ప్రతిష్ఠించి పూజించు చుండిన మీకు, మీ గ్రామ ప్రజలకు పుణ్యము ప్రాప్తించునని చెప్పగా విని ఆ పెద్దలందరు సంతోసించి ఒక సుముహూర్తమున ఆ విగ్రహాన్ని అల్లాడుపల్లె గ్రామమునకు తెచ్చి గురువయ్యాచార్యులచే విగ్రహమును ప్రతిష్ఠింప జేయించి వారినే అర్చకులుగా నియమించిరి. ** ఆ శిలా విగ్రహమును పూర్వము కుముద్వతి పూజించినందున వీరభద్రస్వామి అని, పోతులమడుగులో లభించినందున పోతులూరయ్యస్వామి అని నామ ద్వయముచే పూజలందుకొను చుండెను. అందులకే వారి గృహనామము పోతులూరువారు అను వాడుక గలదు. గురువయ్యాచార్యులు ఈశ్వరమ్మ దంపతులిద్దరు ప్రతిదినము పూజించుచుండిరి. అంతవరకు వారికి సంతానము కానందున ఒకనాడు ఈశ్వరమ్మగారు తన భర్తతో నాథా ! సూతులు లేకున్న సుఖములేదందురు కదా! సంతానప్రాప్తికై ఏ దేవుని పూజించవలె, ఏ నోములు నోమవలె ఏ వ్రతము చేయవలెనో చెప్పుడని ప్రార్థించగా! ఓ సతీ ! అన్ని పూజలకన్న గురుపుష్యయోగ వ్రతపూజ త్వరగా ఫలితమిచ్చునని చెప్పగా విని పరమ పతివ్రతయైన ఈశ్వరాంబ గురువారము పుష్యమి నక్షత్రము నుండి సోమవారము అయిదు రోజులు పూజలు చేసెను. ** ఒకనాడ కైలాసపతి స్వప్నదర్శనమిచ్చి ఈశ్వరాంబ లోకకల్యాణార్థమై నేనే నీ పుత్రునిగా జన్మింతునని చెప్పి అదృశ్యుడాయెను.

* చూడుడు ప్రపంచ నిష్ప్రపంచ కందార్థ సంగ్రహ పేజీ 24

** చూడుడు వీరబ్రహ్మండ సర్వశాస్త్ర సమాధానము పేజీ 99